СОЗ (ГОНОРЕЯ)
Жыныстық қатынас арқылы жұғатын бұл ауруды тап басып ажырата алмау, ажыратқан күйде де жолдас-жораның айтуымен өзiңдi-өзiң емдеп, айығып кетуге болатындай көрудiң аяғы оның асқынуына соғады. Сөйтiп сырқат осы күнi көп әңгiмеленiп жүргендей, антибиотик дәрiгерлерге төзiмдi сипат алады. Бұлай бармақ шайнап қалмау үшiн, әрине создан (гонорея) әркiм де хабардар жүруi керек. Сонымен...
Гонококктiң“қызметi”
Жыныстық қатынас арқылы жұғатын бұл кеселдi, созды, тарататын бактерияны – гонококк деп атайды. Оның пошымы – кофенiң дәнi сияқты, көзге тек микроскоп арқылы көрiнедi.
Қалай жұғады?
Екi түрлi жолмен жұғады. Оның бiрi әлгiнде айтқанымыздай – жыныстық жол. Екiншiсi – тұрмыстық ауыс-түйiстер. Мәселен, созға шалдыққан, яғни гонококк таратушы, адаммен бiр төсектi, бiр орамалды, бiр ванна, бiр әжетхананы пайдалану. Алайда сырқаттың мұндай жағдайда жұғуы өте сирек.
Белгiсi қандай?
Ер адамның созға ұшырағаны оңай бiлiнедi. Сырқат кiсiмен төсек қатынасында болғаннан кейiн 3-9 күн аралығында оның жыныс мүшесiнiң басынан iрiң аға бастайды. Ауруды асқындырмау үшiн науқас әне-мiне деп жүрiп алмай сол бойда венеролог-дәрiгерге баруы керек. Әркiмдердiң айтуымен өз бетiнше антибиотик қабылдап, өзiн-өзi емдеген адам созды асқындырып, гонококктың дәрiге төзiмдiлiгiн арттырып тынады. Себебi аурудың толық жазылған-жазылмағаны тек зертханалық жолмен анықталады. Әйел адамның бойынан создың анықталуы ерлерге қарағанда әлдеқайда күрделi. Гонококк әйелдiң сыртқа жыныс ағзасына, қынапқа ешқандай зардап келтiрмейдi, одан бiлiнбейдi. Қоздырғыш 80-95 пайыздай жағдайда шырышты қабықпен жатыр мойынының безiн, несеп жолын, 10-20 пайыздай жағдайда қынап ауызындағы үлкен без – бартолин безi мен тiк iшектiң ауызын зақымдайды. Соз көбiнесе несеп жолына зардабын тигiзедi. Ол түзге отырған кезде дызылдап аурады. Алайда суықтың, салқын тигеннiң әсерi шығар, – деп оған ешкiм мән бере қоймайды. Сырқат тiптi жатырға, жатыр түтiкшесiне, аналық без бен құрсаққа жайылғанша байқалмауы ықтимал. Науқас iштiң төменгi тұсы ауырып, дене қызуы көтерiлгенде барып, бiрақ сезiлуi ғажап емес. Кейде iш қатуы да (запор) мүмкiн. Соз кезiнде жатыр мойыны зақымданатындықтан көкшiл-сарғыш сұйық бөлiнедi. Бiрақ ондай белгi мен ауыру сезiмi қынап немесе бартолин безi қабынған кезде де бола бередi. Сондықтан мұндайда гонорея деп сезiктене қою қиын.
Емделмесе не болады?
Создан уақылы емделмеу бедеулiкке ұрындыратын кезi аз емес. Әйелдерде бұл жатыр түтiкшелерi қабырғаларыны ңештеңе өткiзбей, жабысып қалуы салдарынан болады. Гонококк iштегi шарана үшiн де қауiптi. Жүктi әйел одан емделiп, айықпаған жағдайда бактерия нәрестеге берiледi, оның көз алмасының шырышты қабығын зақымдайды. Тиiсiнше ем қолданылмаса, ондайда нәресте зағипқа, су қараңғы соқырға айналады.
Создан емделмей, iрiң тоқтаусыз аға берсе, сыртқы жыныс мүшесiнде сүйел тәрiздес өскiн – кондилома түзiледi. Бiрдеңе жұғысты дегенше, қанталап, талаурап шыға келетiн кондилома сүйелiнiң өздiгiнен кете қоюы қиын, одан тек хирургиялық ем ғана құтқарады.
Мұны есте сақтаңыз
Жалпы, соз да, жыныстық қатынас арқылы жұғатын басқа ауруларда бастапқы кезде жөндi сезiлмейдi. Сол себептi де өзiңiзден әлдебiр кездейсоқ төсек қатынасынан кейiн көп ұзамай мынадай жай-күй байқалды дегенше, венеролог маманға көрiнiңiз:
* Түзге отырған, дәретке отырған кезде ауру сезiнсеңiз;
* Жыныс мүшеңiзден, яғни қасаба мен қынаптан иiсi жағымсыз, түссiз сұйық бөлiнсе;
* Жыныс мүшесi бөртiп, дуылдап, қышыса;
* Бел немесе шат ауырса;
* Төсек қатынасы кезiнде ауру аңғарылса;
* Жыныс мүшесiнiң тiк шектiң төңiрегiнде iсiну әлде дақпайда болып, ауру сезiлсе;
* Дененiң қызуы көтерiлсе.
Өзiңiзден осындай қалып байқасаңыз, жыныстық қатынастан тиылыңыз. Төсектес жұбыңызға ауруыңыз туралы ескертiп, маман дәрiгерге көрiнiп, зертханалық тексеруден өтудi талап етiңiз. Бұл одан басқалардыңда, өзiңiздiңде қайтадан ауру жұқтыруыңыздың алдын алады.
С. КАРИМОВА
|